Það var fyrir rúmum tveimur árum að við prófuðum avókadódrykk á Joe & The Juice í Kaupmannahöfn. Kannski ekki til stórtíðinda nema að það má segja að við urðum háð drykknum. Verðum eiginlega að fá hann á hverjum morgni. Við reyndar breyttum honum og gerðum hann að okkar smekk. Nú er drykkurinn útbúinn á hverjum einasta morgni. Börnin eru líka sjúk í drykkinn og það er ósjaldan keppst um að fá restina. Stundum útbúum við hann og tökum með okkur til að hafa á ferðinni. Það góða við drykkinn er að hann er saðsamur og að sjálfsögðu hollur. Hér er uppskriftin fyrir áhugasama en hún dugar fyrir fjóra:

• 2 avókadó
• Frosið mangó – rúmlega lúka eða eftir smekk (látið þiðna í ca 15 mín). Einnig hægt að nota ferskt mangó. Þá gæti verið gott að nota nokkra klaka með.
• Safi úr 1 sítrónu.
• Kókos-rísmjólk fyllt upp fyrir mangóið, í ca 1000 mL – eða önnur mjólk eftir smekk.
• 1 msk hunang – má að sjálfsögðu sleppa en við viljum hafa drykkinn aðeins sætan.

Allt sett í blandara og blandað vel saman. Nammi namm…